ການຜະລິດທີ່ຕິດພັນກັບຄຸນນະພາບແລະຄວາມຕ້ອງການຂອງຄົນຍີ່ປຸ່ນ ເປັນບາດກ້າວໃນການສ້າງຄວາມໜ້າເຊື່ອຖືແກ່ກາເຟຂອງທ່ານ. ການຕະຫຼາດ, ເປັນອີກໜຶ່ງຫົນທາງໃນການສ້າງໃຫ້ກາເຟຂອງທ່ານມີຄວາມໜ້າເຊື່ອຖື, ເຮັດໃຫ້ມະຫາຊົນໄດ້ຮັບຊາບຄຸນລັກສະນະສະເພາະທີ່ກາເຟຂອງທ່ານຈະສະໜອງໃນຕະຫຼາດ ແລະ ສ້າງໃຫ້ຄົນມີຄວາມນິຍົມຊົມຊອບ.
ການຕະຫຼາດບັນຈຸເອົາຫຼາຍອົງປະກອບເຕັກນິກເພື່ອໂຄສະນາຄຸນລັກສະນະຂອງກາເຟໃຫ້ມີຄຸນຄ່າສູງຂື້ນ ແລະ ສ້າງຄວາມພໍໃຈແກ່ລູກຄ້າເປົ້າ. ຮູບແບບການໂຄສະນາມັກປະສົມປະສານກັນລະຫວ່າງທາງອອນໄລ ແລະ ທາງສິ່ງພິມຕ່າງໆ. ວຽກງານຫຼັກຂອງການຕະຫຼາດໄດ້ເນັ້ນເອົາການເຜີຍແຜ່ ຄຸນຄ່າຂອງສິນໂດຍບໍ່ມີການບິດເບືອນຄວາມເປັນຈິງ ເພື່ອເຮັດໃຫ້ລູກຄ້າໄດ້ຂໍ້ມູນກ່ອນການຕັດສິນໃຈ. ເຕັກນິກການຕະຫຼາດເປັນເຄື່ອງມືທີ່ມີສີສັນ ໃນການນຳສະເໜີຄຸນຄ່າ ແລະ ກະຕຸ້ນໃຫ້ຜູ້ຊົມໃຊ້ຕັດສິນໃຈຊື້. ວຽກງານການຕະຫຼາດໄດ້ກວມເອົາຫຼາຍອົງປະກອບ ແລະ ມີທີມງານຈັດຕັ້ງປະຕິບັດທຸກໆລະດັບ ເພື່ອຮ່ວມກັນນຳເອົາຄຸນຄ່າຂອງຜົນຜະລິດອອກສູ່ຕະຫຼາດ. ສິ່ງຕັດສິນຄວາມສຳເລັດ ໃນວຽກງານການຕະຫຼາດ ກໍ່ຂື້ນກັບຫຼາຍໆປັດໃຈ ເປັນຕົ້ນແມ່ນ: ຄຸນນະພາບຂອງກາເຟເອງ, ລາຄາສະໜອງ, ຄວາມສາມາດຊື້ຂອງລູກຄ້າເປົ້າໝາຍ, ແລະ ຄູ່ແຂ່ງ. ຫາກທີມງານການຕະຫຼາດສາມາດເຂົ້າໃຈ ບັນຫາດັ່ງກ່າວ ຢ່າງຖີ່ຖ້ວນ ຈະເຮັດໃຫ້ສາມາດສ້າງແຜນການປະຕິບັດງານໃນຕົວຈິງໄດ້ຢ່າງມີປະສິດທິຜົນໃນການນຳເອົາຜະລິດຕະພັນອອກສູ່ຕະຫຼາດ.
ເນື່ອງຈາກກາເຟລາວສົ່ງອອກໄປປະເທດຍີ່ປຸ່ນເປັນກາເຟໝາກຂຽວ. ຮູບແບບການໂຄສະນາອາດບໍ່ມີຄວາມສັບສົນ ແລະ ຈຳເປັນຕ້ອງໃຊ້ງົບປະມານແພງໆເພື່ອສຶກສາຕະຫຼາດຄວາມຕ້ອງການຍີ່ປຸ່ນ. ບັນຫາດ້ານຄຸນນະພາບ ແລະ ຄວາມປອດໄພ ເປັນສິ່ງທີ່ຕ້ອງການຫຼັກຂອງການຜູ້ບໍລິໂພກ. ສະນັ້ນການປັບປຸງຂັ້ນຕອນການຜະລິດ ແລະ ການຍົກລະດັບຄຸນນະພາບໃຫ້ສູງຂື້ນ ເປັນສິ່ງທີ່ຕ້ອງໄດ້ເອົາໃຈໃສ່. ການສ້າງຖານຂໍ້ມູນການຜະລິດຄຸນນະພາບຜ່ານທາງເວັບໄຊ, ສື່ອອນໄລ, ສິ່ງພິມທີ່ຈຳເປັນ ເພື່ອນຳເອົາຂໍ້ມູນການຜະລິດ, ເຕັກນິກການຜະລິດຄຸນນະພາບດັ່ງກ່າວອອກມາສູ່ສັງຄົມຈະເປັນການສ້າງຄວາມສົນໃຈໃຫ້ແກ່ຜູ້ຊື້ລາຍໃໝ່ເຂົ້າມາຕິດຕໍ່, ທົດລອງຊີມ ແລະ ຕັດສິນເຮັດການຄ້າ.
ພາກລັດກໍ່ມີບົດບາດຫຼາຍໃນວຽກງານການໂຄສະນາຂະແໜງກາເຟລາວ. ນັບແຕ່ການສ້າງສື່ໂຄສະນາຄຸນນະພາບ, ຄວາມສຳຄັນຂອງຂະແໜງກາເຟ ໃນວຽກງານພັດທະນາຊີວິດການເປັນຢູ່ຂອງປະຊາຊົນ ຜ່ານທາງງານວາງສະແດງ. ຂໍ້ມູນການຜະລິດເປັນເງື່ອນໄຂທຳອິດໃນການສ້າງໃຫ້ຜູ້ຊື້ ແລະ ຜູ້ຜະລິດໄດ້ພົບກັນ. ບັນດານັກທຸລະກິດກາເຟຍີ່ປຸ່ນ ມີຄວາມສາມາດໃນການຊີມກາເຟ ແລະ ຈັດໝວດຄຸນນະພາບ. ຜ່ານການທົດລອງຊີມເຂົາເຈົ້າສາມາດວັດແທກຄຸນນະພາບກາເຟ ແລະ ຮັບຮູ້ໄດ້ວ່າກາເຟນອນໃນຄຸນນະພາບລະດັບໃດ, ລາຄາຄວນເປັນເທົ່າໃດ, ຫຼື ມີຂອດການຜະລິດໃດຕ້ອງໄດ້ດັດປັບ ເພື່ອໃຫ້ໄດ້ຣົດຊາດທີ່ຕ້ອງການ. ການສະໜອງຂໍ້ມູນຜ່ານທາງສື່ອອນໄລ Facebook ກໍ່ເປັນຫົນທາງໜຶ່ງໃນການສື່ສານທີ່ໃຊ້ງົບປະມານບໍ່ສູງ ແລະ ສາມາດແຈ້ງຂໍ້ມູນ ຂະບວນການຜະລິດໃຫ້ແກ່ສັງຄົມ ແລະ ຄົນທີ່ອາດສົນໃຈສັ່ງຊືນຳບໍລິສັດຂອງທ່ານໃນຕໍ່ໜ້າ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
