ຫາກຊີວິດຄົນເຮົາໜູນວຽນໄປເລື້ອຍໆ, ພວກເຮົາຕ້ອງເມື່ອຍລ້າ. ບໍ່ມີຈຸດຈົບແລະເລີ່ມຕົ້ນ. ຊ່ວງປີໃໝ່ ເປັນໂອກາດໄດ້ທົບທວນ ແລະ ປ່ອຍວາງອາດີດ ທີ່ບໍ່ດີໄວ້ຂ້າງຫຼັງ. ປີ່ນຫຼັງໃຫ້ຄວາມສຳເລັດເກົ່າໆເພື່ອເລີ່ມຕົ້ນໃສ່ສິ່ງໃໝ່ແລະດີໆໃນອີກ 365 ວັນຂ້າງໜ້າ.
ຈະມີຈັກຄົນທີ່ໄດ້ທຸກໆຢ່າງທີ່ຕົນເອງຕ້ອງການບໍ່ວ່າຈະເປັນວັດຖຸ, ເງິນທອງ, ຄົນຮັກ, ແລະ ຖານະຕຳແໜ່ງ ໃນປີທີ່ຜ່ານມາ. ຫາກທ່ານບໍ່ເປັນໜຶ່ງໃນນັ້ນ, ກໍ່ໝາຍວ່າປີໃໝ່ທີ່ຈະມານີ້ກໍ່ຍິ່ງຕ້ອງໄດ້ບຸກບືນແລະສານຕໍ່ຄວາມຝັນເພື່ອຍາດແຍ່ງ. ຂ້າພະເຈົ້າວາດພາບບໍ່ອອກວ່າ ຊີວິດທີ່ບໍ່ມີເປົ້າໝາຍ ແລະ ຄວາມຝັນ ຈະເປັນຊີວິດທີ່ມີຄວາມໝາຍແນວໃດ? ຊ່ວງປີໃໝ່ເປັນໄລຍະເວລາທີ່ດີທີ່ສຸດໄດ້ທົບທວນເປົ້າໝາຍທີ່ທ່ານຢາກບັນລຸຜົນ.
ສຳລັບຄົນທີ່ບໍ່ມີໂອກາດທາງສັງຄົມ, ຄົນທີ່ມີພື້ນຖານຄອບຄົວທຸກຈົນ ແລະ ຫ່າງໃກສອກຫຼີກ ກໍ່ຕ້ອງໄດ້ຍິ່ງອອກແຮງຕັ້ງໜ້າ. ຄວາມທຸກຈົນທີ່ທ່ານມີເປັນສິ່ງທີ່ບອກວ່າທ່ານຍິ່ງຕ້ອງໄດ້ສ້າງຄຸນຄ່າໃຫ້ແກ່ສັງຄົມຫຼາຍຂື້ນ. ທ່ານອາດຕັດສິນໃຈຜະລິດສິນຄ້າ, ສ້າງການບໍລິການແກ່ສັງຄົມ. ຫາກທ່ານເປັນພະນັກງານໃນອົງການຈັດຕັ້ງ ແລະ ບໍລິສັດ, ທ່ານ ກໍ່ຍິ່ງຕ້ອງໄດ້ອອກເຫືອເທແຮງໃສ່ເພື່ອສ້າງຄຸນຄ່າໃຫ້ແກ່ອົງການຈັດຕັ້ງ. ຫາກເມື່ອໃດອົງການຈັດຕັ້ງມີຄວາມຈະເລີນກ້າວໜ້າ ແລະ ຜົນກຳໄລ, ທ່ານກໍ່ອາດຈະໄດ້ຮັບສ່ວນແບ່ງທີ່ສູງຂື້ນ.
ເມື່ອມາເບິ່ງໃນວົງກ້ວາງ. ສ ປ ປ ລາວເປັນປະເທດທີ່ຍິ່ງຕ້ອງໄດ້ປະກອບສ່ວນໃສ່ການພັດທະນາໂລກ. ເຮົາເປັນສ່ວນໜຶ່ງທີ່ ຍັງມີຫຼາຍອັນຕ້ອງໄດ້ພັດທະນາ. ເປັນຕົ້ນແມ່ນ ການພັດທະນາໂຄງລາງພື້ນຖານຕ່າງໆ, ໂຮງໜໍ, ໂຮງຮຽນ, ແລະ ອື່ນໆ. ເມື່ອມາເບິ່ງຕົວເລກວັດແທກເສດຖະກິດສະເລ່ຍຕໍ່ຫົວຄົນແລ້ວຍັງຕໍ່າກວ່າປະເທດອ້ອມຂ້າງແລະກໍ່ຄືທົ່ວໂລກ. ເຊິ່ງໝາຍວ່າຜົນຜະລິດຂອງຄົນລາວໂດຍສະເລ່ຍແລ້ວຍັງບໍ່ສູງ, ມີມູນຄ່າຕໍ່າ ແລະ ໂດຍລວມບໍ່ທັນສາມາດແຂ່ງຂັນກັບສາກົນໄດ້. ຄວາມສຳເລັດຂອງຄົນລາວແຕ່ລະຄົນ ໃນວຽກງານການຜະລິດສິນຄ້າທີ່ລໍ້າເລີດ ແລະ ໃຫ້ບໍລິການແກ່ສັງຄົມດີຂື້ນ ກໍ່ໝາຍວ່າທ່ານໄດ້ສ້າງຄວາມສຳເລັດໃຫ້ແກ່ສັງຄົມເຊັ່ນດຽວກັນ.
ຫາກທ່ານບໍ່ຄິດເຫັນວ່າທ່ານມີຄວາມສຳຄັນຕໍ່ປະເທດຊາດ, ກໍ່ຈົ່ງເລັ່ງໃສ່ຜົນປະໂຫຍດສ່ວນຕົວ ໂດຍບໍ່ບຽດບຽນສັງຄົມ. ດ້ວຍການສ້າງສັນຜະລິດຕະພັນ ແລະ ການບໍລິການທີ່ດີເລີດຮັບໃຊສັງຄົມ. ຫາກທ່ານສາມາດຫັນຕົນເອງເປັນຄົນທີ່ສ້າງຄຸນຄ່າໃຫ້ແກ່ສັງຄົມ ດ້ວຍການປະດິດສິນຄ້າ, ໃຫ້ບໍລິການຊ່ວຍພັດທະນາຊຸມຊົນ ກໍ່ຈົ່ງຄຳນືງວ່າ: ຄຸນຄ່າໃດທີ່ທ່ານຈະມອບໃຫ້ແກ່ສັງຄົມຈາກການດຳເນີນທຸລະກຳນັ້ນ. ຂ້າພະເຈົ້າເຊື່ອວ່າ: ຈະມີການພັດທະນາໄດ້ກໍ່ຕ້ອງແມ່ນການເກີດຄວາມຕັ້ງໃຈຂອງບຸກຄົນ. ເມື່ອແຕ່ລະບຸກຄົນຕັ້ງໜ້າຮັບຜິດຊອບໜ້າທີ່ຕົນເອງສຳເລັດທີ່ວາງໄວ້, ສັງຄົມກໍ່ຈະໄດ້ຮັບຜົນນຳແນ່ນອນ.
ປະເທດທີ່ຍັງດ້ອຍພັດທະນາທີ່ສຸດລວມເອົາປະເທດລາວຂອງພວກເຮົານຳ. ການສ້າງວຽກງານໃຫ້ເກີດເປັນຈິງ ຕ້ອງການການຄົ້ນຄິດ, ປະຍຸກ, ນຳໃຊ້ ແລະ ດັດແກ້ເພື່ອໃຫ້ເກີດຜົນສຳເລັດ. ຫາກທ່ານມີຄວາມຄິດດີໆຈົ່ງຮີບຮ້ອນສ້າງຂື້ນມາ, ຫາກທ່ານຍັງບໍ່ທັນມີຄວາມຄິດນັ້ນເທື່ອຈົ່ງຮີບຮ້ອນຄົ້ນຄິດ. ເລີ່ມຕົ້ນທີ່ປີໃໝ່.
ທ້າຍສຸດນີ້, ຂ້າພະເຈົ້າໄດ້ສົ່ງຄຳອວຍພອນທີ່ປະກອບດ້ວຍຂໍ້ຄວາມທີ່ມີຄວາມໝາຍ, ພາບປະກອບ ແລະ ສຽງດົນຕີທີ່ສວຍງາມເຕັມໄປດ້ວຍຄວາມໝາຍ. ເນື້ອໃນລວມກໍ່ຄືການເຂົ້າມາຮ່ວມຝັນກັນທຸກໆຄົນເພື່ອສ້າງຄວາມສຳເລັດ. ໜຶ່ງຄົນໜຶ່ງຄວາມຝັນໜຶ່ງຄວາມສຳເລັດເປັນຢ່າງຕໍ່າ. ເປັນການສັງລວມເອົາພາບດີເດັ່ນໃນຂົງເຂດທົ່ວໂລກ. ອັນໜຶ່ງທີ່ຍົກຂອງເພີ່ນຂື້ນມາກໍ່ເພື່ອສ້າງໃຫ້ເຫັນວ່າ: ສ ປ ປ ລາວຕ້ອງໄດ້ມີສ່ວນປະກອບໃນການສ້າງສັນສິ່ງທີ່ເດັ່ນຄືກັນກັບປະເທດອື່ນໆ. ກ່ອນອື່ນໝົດກໍ່ແມ່ນເພື່ອອຸດົມການຂອງຕົນເອງ, ກໍ່ຄືຂອງປະເທດ ແລະ ເພື່ອທຸກໆຄົນໃນໂລກ. ອີກຄັ້ງ “ຂໍໃຫ້ທຸກໆຝັນຂອງທ່ານເປັນຈິງໃນປີ 2017”
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
