ຮູບແບບຂອງ E-Business ໄດ້ຖືກກຳນົດ ແລະ ຈັດປະເພດດ້ວຍຫຼາກຫຼາຍວິທີ. ໃນການ ຈັດຕັ້ງປະຕິບັດ, ທຸລະກິດສາມາດປະສົມປະສານກັບຫຼາຍຮູບແບບທີ່ແຕກຕ່າງກັນ ຕາມຍຸດທະສາດທຸລະກິດຂອງທ່ານ.
ຍົກເອົາໝວດພື້ນຖານຂອງຮູບແບບທຸລະກິດປະກອບມີດັ່ງນີ້:
1. ຮູບແບບການໂຄສະນາ
ຮູບແບບການໂຄສະນາຜ່ານເວບໄຊ ເປັນຮູບແບບການໂຄສະນາທີ່ໄດ້ມາຈາກການ ໂຄສະນາຜ່ານທາງ ໂທລະພາບ ແລະ ວິທະຍຸ. ໃນກໍລະນີນີ້, ເວັບໄຊເຮັດວຽກຄືກັນກັບການອອກອາກາດສົດ. ຕາມທຳມະດາແລ້ວ ມັນໃຫ້ການບໍລິການເນື້ອໃນ ແລະ ການບໍລິການໂຄສະນາໂດຍບໍ່ຄິດຄ່າ. ເວັບໄຊສາມາດ ມີລາຍໄດ້ ຈາກການສະແດງຂໍ້ຄວາມ ໃນຮູບແບບຂອງປ້າຍໂຄສະນາ (banner ads). ຜູ້ອອກອາກາດອາດຈະເປັນຜູ້ສ້າງເນື້ອໃນ ຫຼື ອາດຈະສັງລວມເນື້ອໃນທີ່ຂຽນຂື້ນມາແລ້ວຈາກບ່ອນອື່ນ. ຮູບແບບການໂຄສະ ນາຈະເຮັດໄດ້ດີກໍ່ຕໍ່ເມື່ອ ປະລິມານຂອງຜູ້ເຂົ້າຊົມເວັບໄຊມີຫຼາຍກຸ່ມຄົນ ຫຼື ແຕ່ລະກຸ່ມຄົນທີ່ມີປະລິມານຫຼາຍ.
2. ຮູບແບບຜ່ານເວັບໄຊ໊ກາງ (ແມ່ຄ້າຄົນກາງ)
ນຳເອົາເຄື່ອງຄົນອື່ນມາຂາຍຜ່ານເວັບໄຊ໊. ການຂາຍອາດຈະອິງຕາມບັນຊີລາຄາ ຫຼືຈາກການປະມູນ. ພາບພົດຂອງເວັບໄຊ ແລະ ການສ້າງຄວາມຮູ້ສຶກ; ທັງສອງ ລວມເຂົ້າກັນກາຍເປັນ ຮູບແບບການສ້າງຄວາມໜ້າເຊື່ອຖືຂອງເວັບໄຊ ແລະ ເປັນທາງເລືອກໃນການຊື້ ແກ່ຜູ້ຊົມໃຊ້. ອົງປະກອບພື້ນຖານດັ່ງຕໍ່ໄປນີ້:
- ການນຳສະເໜີຜະລິດຕະພັນ
- ແຜນທີ່ຂອງເວັບໄຊ ສະແດງວິທີໃຫ້ຜູ້ເຂົ້າເບິ່ງເວັບໄຊສາມາດເຂົ້າເບິ່ງໄດ້ທົ່ວໆ
- ການສັ່ງຊື້ຜ່ານອອນໄລ – ການຊື້ເຄື່ອງດ້ວຍບັດເຄຼດິດ
- ໜ້າທີ່ຂອງການນຳໃຊ້ ເຕັກໂນໂລຍີ – ການຄົ້ນຫາ, ການປະກົດມີຂໍ້ມູນສ່ວນຕົວ
- ການບໍລິການລູກຄ້າ – ທາງໂທລະສັບ, ການສື່ສານທາງອີເມວ
- ບາດກ້າວສຸດທ້າຍ – ຂະບວນການສັ່ງຜ່ານບໍລິສັດຂົນສົ່ງ
- ແຜນການສ້າງຄວາມໄວ້ວາງໃຈ
ຜູ້ຂາຍຍ່ອຍ ແລະ ຂາຍສົ່ງ ຜະລິດຕະພັນ ແລະ ການບໍລິການອອນໄລ ເປັນທີ່ຮັບຮູ້ໃນນາມ ຂອງຜູ້ຂາຍທາງເອເລັກໂທຼນິກ ສາມາດສື່ສານກັບລູກຄ້າ ດ້ວຍການສົ່ງຈົດໝາຍທຸລະກິດເພື່ອສັ່ງສິນຄ້າ, ກ້າວເຂົ້າສູ່ການເຮັດກາຕາລອກຜະລິດຕະພັນ ແລະ ລະບົບການສັ່ງທາງອິນເຕີເນັດທີ່ມີຜົນສຳເລັດເປັນຢ່າງດີ.
3. ຮູບແບບຂາຍຕົງ
ອົງປະກອບອັນໜຶ່ງທີ່ເປັນໂອກາດ ສຳລັບທຸລະກິດ ທາງອິນເຕີເນັດ ແມ່ນຄວາມສາມາດ ຂອງ ຜູ້ຜະລິດ ໃນການເຂົ້າຫາຜູ້ຊື້ໄດ້ໂດຍກົງ. ດັ່ງນັ້ນ ການຍົກລະດັບຕ໋ອງໂສ້ ການຈຳໜ່າຍໄດ້ຢ່າງມີປະສິດທິຜົນຈິ່ງເປັນສິ່ງທີ່ຈຳເປັນ. ການປະກົດຕົວຂອງອອນໄລ ກາຍເປັນສ່ວນທີ່ສຳຄັນສຳລັບຜູ້ຜະລິດ. ຜູ້ໃຫ້ບໍລິການອິນເຕີເນັດ ໄດ້ນຳເອົາວິທີເຂົ້າສູ່ລູກຄ້າ, ສ້າງການຄົ້ນຄ້ວາ, ແລະ ສ້າງສາຍພົວພັນກັບລູກຄ້າແຕ່ລະຄົນ. ລູກຄ້າຖືກຊວນເຊີນເຂົ້າມາສູ່ວິທີການຊື້ເຄື່ອງໃນຮູບແບບໄໝ່, ຊອກຫາຜະລິດຕະພັນ ແລະ ຍີ່ຫໍ້ ໄໝ່ໆທົ່ວທຸກຫົນແຫ່ງ. ຍິ່ງໄປກວ່ານັ້ນ ລູກຄ້າມີຄວາມຮູ້ສຶກສະດວກສະບາຍ ຍ້ອນການປະຍັດເວລາ ແລະ ເງິນ, ແລະ ສາມາດຊື້ໄດ້ຕະຫຼອດ 24 ຊົວໂມງຕໍ່ມື້. ຮູບແບບນີ້ເຮັດໃຫ້ຜູ້ຜະລິດ ສາມາດເຂົ້າຫາຕະຫຼາດໄດ້ໂດຍຕົງ ແລະ ສາມາດຫຼຸດຂັ້ນຕອນການຈຳໜ່າຍລົງ. ດັ່ງນັ້ນ, ຈຸດຫຼັກຂອງພາກນີ້ແມ່ນການສ້າງພື້ນຖານ ຂອງຄວາມເຂົ້າໃຈທີ່ດີຂື້ນ ກ່ຽວກັບຄວາມຕ້ອງການຂອງລູກຄ້າ ແລະ ພັດທະນາການບໍລິການແກ່ລູກຄ້າ.
ປະຈຸບັນ, ການຂະຫຍາຍຕົວການຄ້າທາງອອນໄລໄວກວ່າທີ່ຄິດ. ດັ່ງນັ້ນຈິ່ງມີນັກພັດທະນາ ສ້າງຊອບແວໃໝ່ໆ ເຂົ້າມານຳໃຊ້. ນີ້ເປັນສີສັນຂອງການຄ້າອອນໄລ ທີ່ເປັນຜົນປະໂຫຍດດີແກ່ທຸລະກິດ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
