ເຮັດໃຫ້ຄົນມັກ

ຈຳເປັນບໍ່ໃຫ້ຄົນອື່ນມາມັກ? ການເປັນຕົວຕົນເອງໜ້າຈະດີທີ່ສຸດ ເພາະບໍ່ຕ້ອງຝືນເຮັດໃນສິ່ງທີ່ເຮົາບໍ່ມັກ. ບົນເງື່ອນ ໄຂວ່າ ພຶດຕິກຳຂອງເຮົາ ສະບາຍໃຈ ແລະ ບໍ່ບຽດບຽນຄົນອື່ນກະໜ້າຈະພໍ. ເຮັດແນວໃດລະ? ທ່ານບໍ່ຈຳເປັນຕ້ອງ ມີລົດຄັນງາມ, ໂຊເຄື່ອງແພງໆທີ່ທ່ານມີໃຊ້ທາງອອນໄລ, ສະແດງພາບໄປຕ່າງປະເທດ, ໃຊ້ມືຖືລຸ້ນລ້າສຸດ. ເຊື່ອບໍ່ ທ່ານ ວິທີທີ່ຈະເຮັດໃຫ້ຄົນມາມັກ ໂດຍບໍ່ຕ້ອງປົກປິດ ແລະ ຕົວະ ໃນສິ່ງທີ່ທ່ານບໍ່ແມ່ນໄດ້.

ເປັນຄົນໃຈກ້ວາງ – ໃຫ້ເວລາ, ການໃສ່ໃຈ, ແລະ ປັດໃຈ ທີ່ທ່ານໃຫ້ໄດ້ ໂດຍບໍ່ຄາດຫວັງ ແລະ ຮຽກຮ້ອງຫຍັງ. ການໃຫ້ແກ່ຄົນອື່ນ ສ້າງຄວາມປະທັບໃຈໃຫ້ແກ່ຄົນອື່ນ.

ຈິດແຈ່ມໃສ່ – ເປັນຄົນສ້າງຮອຍຍີ້ມ ແລະ ມ່ວນຊື່ນສະເໜີ. ພຶດຕິກຳນີ້ ຈະຊ່ວຍເຮັດໃຫ້ການສື່ສານ ແລະ ດຳລົງຊີວິດບໍ່ເຄັ່ງຕືງ. ເຮັດແນວນັ້ນປະຈຳ ຈະເຮັດໃຫ້ ຫຼາຍໆຄົນ ທີ່ເຮົາພົວພັນນຳ ມ່ວນຊື່ນກັບການສົນທະນາ.

ເບິ່ງໂລກໃນແງ່ດີ – ບໍ່ໝາຍວ່າເຫັນສິ່ງບໍ່ດີກາຍເປັນດີ. ພຽງແຕ່ຮັບຮູ້ ແລະ ຊື່ນຊົມໃນສິ່ງດີໆທີ່ມີ. ການສ້າງຈິດສຳນຶກແນວນັ້ນ ຈະເຮັດໃຫ້ເຮົາ ມີສະມາທິຄິດແກ້ໄຂ ບັນຫາດ້ານລົບ.

ຮັກລູກ – ຮັກແນວນີ້ແມ່ນມາຈາກຄວາມຮູ້ສຶກແທ້ໆ. ເມື່ອໃດທ່ານສະແດງຄວາມຮັກແກ່ລູກໆ, ໃຫ້ການໃສ່ໃຈ, ພາໄປຫຼີ້ນ, ໄປໂຮງຮຽນ ແມ່ນຈະເປັນທີ່ນິຍົມໃນສັງຄົມ.

ຊື່ສັດຕໍ່ຄົນຮັກ – ພາບການຫຼີ້ນກິນ, ການນອກໃຈ ມັກເປັນທີ່ປະນາມຫຼາຍ. ເມື່ອໃດທ່ານສະແດງ ຮັກແກ່ຄົນທີ່ທ່ານປະກາດຮັກ ໃນສັງຄົມ, ມັກເປັນທີ່ນິຍົມ. ການເຮັດແນວນັ້ນ, ໝູ່ເພື່ອນ ແລະ ພີ່ນ້ອງ ຈະສັນເສີນທ່ານສະເໜີ.

ເປັນຄົນເຂັ້ມແຂງ – ໃນສັງຄົມຈະມັກຊື່ນຊົມຄົນບຸກບືນຜ່ານຜ່າສະເໜີ. ເຂົາຈະສັນເສີນຄົນທີ່ມີຄວາມບຸກບືນຜ່ານຜ່າຄວາມຫຸ້ຍງຍາກ. ຍິ່ງທ່ານສະແດງຄວາມແຂງແກນ ໃນການຜ່ານຜ່າຄວາມຫຍຸ້ງຍາກ ທ່ານຈະຍິ່ງເປັນທີ່ນິຍົມ.

ຮັກທຳມະຊາດ – ຄົນເຮົາໄດ້ຜົນປະໂຫຍດຈາກທຳມະຊາດຫຼາຍ. ເມື່ອໃດທ່ານສະແດງຄວາມຮັກຕໍ່ທຳມະຊາດ ອັນເປັນທີ່ພັກຂອງຄົນ 7 ຕື້, ສັດ ແລະ ພືດ ນ່າໆພັນ ທ່ານຈະກາຍເປັນບຸກຄົນທີ່ຖືກຈັບຕາໃນສັງຄົມ.

ສັນເສີນຄວາມແຕກຕ່າງ – ເນື່ອງຈາກຄຳວ່າດີ ແລະ ຊົ່ວ ບໍ່ຖືກນິຍາມ ທີ່ແນ່ນອນ. ເມື່ອໃດເຮົາຮັບເອົາແນວຄິດຫຼາກຫຼາຍ ໃນການແກ້ໄຂບັນຫາໃດໜຶ່ງໃຫ້ດີຂື້ນ, ທ່ານຈະເປັນທີ່ຮັກຂອງຄົນຫຼາກຫຼາຍກຸ່ມ.

ຮັກຕົນເອງ – ບໍ່ໝາຍວ່າຫຼົງຕົນເອງ; ເປັນການເຫັນຈຸດດີ ແລະ ອ່ອນຂອງຕົນເອງ. ພາວະການຮູ້ຮັກຕົນເອງ ຈະເຮັດໃຫ້ທ່ານເຫັນຄວາມຕ້ອງການຂອງຕົນເອງ, ແຮງບັນດານໃຈ ແລະ ກະເຫັນໂອກາດການຮ່ວມມືກັບຄົນຫຼາກຫຼາຍອາຊີບ. ແນ່ນອນ, ທ່ານຈະລົດລະແນວຄິດອິດສາຄົນອື່ນ. ເພາະທ່ານຮູ້ວ່າທ່ານກະມີຂອງດີ.

ມີຊີວິດເພື່ອຊີວິດອື່ນ – ສິ່ງນີ້ສຳຄັນຫຼາຍ. ຫາກທ່ານສາມາດເຮັດໃຫ້ຄົນອື່ນເຮັດແນວດີໆໄດ້, ໝາຍວ່າທ່ານ ສາມາດ ກະຕຸ້ນແນວດີໆອອກສູ່ສັງຄົມເພີ່ມຂື້ນ. ລອງເບິ່ງພະພຸດທະເຈົ້າ ແລະ ການນຳປະຕິຫວັດລາວ. ທີ່ສາມາດປົດປ່ອຍປະເທດໄດ້.

ງ່າຍບໍ່? ເຮັດໃຫ້ຄົນມັກ. ຫາກທ່ານເຮັດປະຈຳ ທ່ານຈະຮູ້ວ່າ ການເຮັດໃຫ້ຄົນມັກ ແມ່ນການເຮັດດີ. ແລ້ວທ່ານຈະຮູ້ອີກວ່າ ຫາກເຮັດດີ ບໍ່ຈຳເປັນໃຫ້ໃຜມາມັກກະໄດ້. ມີຫຼາຍໆຄັ້ງ ຄົນເຮົາເຮັດບໍ່ດີ ແລະ ຢາກໃຫ້ຄົນນິຍົມຊົມຊອບ-ສັດທາ. ສິ່ງທີ່ຍົກມາຂ້າງເທິງ, ເປັນພຽງບາງສ່ວນດີໆສ່ວນໜຶ່ງເທົ່ານັ້ນ. ຂ້າພະເຈົ້າເຊື່ອວ່າທ່ານມີແນວດີໆຫຼາຍຢ່າງ ກຳລັງເຮັດ. ບໍ່ແມ່ນເພື່ອໃຫ້ຄົນມັກ ຫາກແມ່ນເພາະທ່ານມັກດີ.