ຄວາມສຳເລັດຂອງການນຳທຸລະກິດເຂົ້າສູ່ອິນເຕີເນັດນັ້ນ, ຄວາມໃສໃຈຂອງການນຳຂັ້ນເທິງເປັນສິ່ງຕັດສິນຄວາມສຳເລັດ. ຖ້າຫາກ ການນຳຂອງບໍລິສັດມີຄວາມຕັ້ງໃຈຫັນປ່ຽນທຸລະກິດສູ່ຍຸກທັນສະໄໝເພື່ອສົ່ງເສີມຄວາມຮັ່ງມີໃຫ້ບໍລິສັດ. ໃນເມື່ອການນຳຕັ້ງໃຈຫັນປ່ຽນທຸລະກິດ, ຄວາມສຳເລັດໃນການລິເລີ້ມ E-Business ກໍ່ເກືອບວ່າເກີນ 50% ແລ້ວ. ສິ່ງທີ່ຕ້ອງໄດ້ໃສ່ໃຈ ຄື: ສ້າງ ແລະ ຈັດຕັ້ງແຜນການພັດທະນາແຜນຍຸດທະສາດ.
ການດັດແປງຍຸດທະສາດ E-Business ທີ່ປະສົບຜົນສຳເລັດ ເລີ້ມຈາກແນວທາງຈາກຂັ້ນສູງ ນັບແຕ່ຂັ້ນຜູ້ບໍລິຫານງານຂັ້ນສູງ ແລະ ຜູ້ບໍລິຫານງານຂັ້ນອາວຸໂສ ຕ້ອງໃສ່ໃຈຢ່າງຈິງຈັງ. ທິດທາງດັ່ງກ່າວນັ້ນ ຕ້ອງມີການພົວພັນກັນກັບທຸກໆ ພາກສ່ວນ ແລະ ອົງການຈັດຕັ້ງໃນວົງກ້ວາງ ເຊັ່ນ: ໃນເວລາພົບປະພິເສດຕ່າງໆ ແລະ ຫຼັກສູດການເຝິກອົບຮົມ ຫຼື ການສຶກສາທົ່ວໆໄປຂອງພະນັກງານບໍລິສັດທຸກໆລະດັບ. ການທົບທວນຄືນ ເປົ້າໝາຍ ຢ່າງເປັນປະຈຳ ຕ້ອງຈັດສັນຢ່າງເປັນລະບົບ, ສືບຕໍ່ພົວພັນກັບທຸກໆພາກສ່ວນ ທີ່ກ່ຽວຂ້ອງໃນອົງການຈັດຕັ້ງ ແລະ ຄູ່ຄ້າຕ່າງໆ. ຍິ່ງໄປກວ່ານັ້ນ, ແນວທາງ ແລະ ຈຸດປະສົງ. ຕ້ອງມີການກວດສອບເບິ່ງແຜນຍຸດທະສາດ ເປັນປະຈຳເພື່ອໃຫ້ສາມາດດຳເນີນການແຂ່ງຂັນທີ່ມີປະສິດ ທິຜົນໄດ້. ຍຸດທະສາດ E-Business ທີ່ປະສົບຜົນສຳເລັດຈະມີລັກສະນະດັ່ງນີ້ :
1.ສ້າງຍຸດທະສາດຕິດພັນຫັບຫຼາຍໆພາກສ່ວນ
ຍຸດທະສາດບໍ່ສາມາດແຍກອອກຈາກ ຮູບແບບການດຳເນີນທຸລະກິດ. ຈຸດປະສົງນຳໃຊ້ຍຸດທະສາດເຂົ້າຫັນປ່ຽນທຸລະກິດ ຕ້ອງໄປພ້ອມໆກັບຄວາມຕ້ອງການຂອງທຸລະກິດ ໃນແຕ່ລະວັນ. ເຊັ່ນ: ຕ້ອງມີການສ້າງຄວາມຮັບຮູ້ ກ່ຽວກັບຂ່າວສານ ຂອງຜະລິດຕະພັນ ແລະ ການບໍລິການຂອງອົງການຈັດຕັ້ງຂອງທ່ານເອງຜ່ານທາງອອນໄລ. ຕ້ອງທົບທວນຢ່າງເປັນປະ ຈຳວ່າຍຸດທະສາດຂອງອົງການຈັດຕັ້ງ ຈະພັກດັນການຂະຫຍາຍຕົວຂອງຕະຫຼາດ ທີ່ອາດຈະມີການປ່ຽນແປງໄວໄດ້ແນວ ໃດ? ຕ້ອງມີການດຳເນີນງານຢ່າງສະໝໍ່າສະເໝີ ແລະ ທິມງານປະສານກັບການນຳຂອງກຸ່ມພາຍໃນບໍລິສັດ ເພື່ອຮັບ ປະກັນການຈັດຕັ້ງປະຕິບັດທີ່ເປັນຜົນ.
2. ປະຕິກິລິຍາຄວາມຮັບຮູ້ຂອງ ທຸກໆພາກສ່ວນ
ປະຕິກິລິຍາຂອງອົງການຈັດຕັ້ງ ກັບບັນດາກຸ່ມຕ່າງໆ ທີ່ກຳລັງປະຕິບັດ ຍຸດທະສາດ E-Business ມີຄວາມສຳຄັນ. ທ່ານຄວນສັງເກດ ເບິ່ງຮູບແບບພຶດຕິກຳການປ່ຽນແປງຂອງພະນັກງານຢ່າງຈິງຈັງ. ເນື່ອງຈາກບັນດາພະນັກງານທີ່ ກ່ຽວຂ້ອງ ມີຄວາມສຳຄັນ ແລະ ມີບົດບາດສຳຄັນໃນການດຳເນີນວຽກງານຂອງ E-Business. ສາຍພົວພັນດັ່ງກ່າວ ແລະ ກຸ່ມຄົນເຫຼົ່ານັ້ນ ເປັນຜູ້ກຳນົດຄຸນລັກສະນະຂອງ E-Business ເຊັ່ນດຽວກັນກັບເຄື່ອຄ່າຍ ທີ່ນ້ອຍໆ, ຈະເຮັດໃຫ້ອົງການຈັດຕັ້ງມີຄວາມສະດວກສະບາຍຫຼາຍຂຶ້ນ ຈົນສາມາດປ່ຽນແປງບູລິມະສິດຂອງວຽກງານ ແລະ ຍົກບົດບາດຂອງອົງການຈັດຕັ້ງຕົນເອງຂຶ້ນ. ນີ້ແມ່ນ ເນື້ອແທ້ຂອງທຸລະກິດແບບດັ່ງເດີມ ເຊິ່ງສະແດງລັກສະນະ ການປະສານງານຂອງຫຼາກຫຼາຍບົດບາດ, ໄລຍະເວລາການສະໜອງ ແລະ ຮູບແບບການຈຳໜ່າຍ ທີ່ໃຊ້ແຮງງານຄົນ.
- ລະບົບຂ່າວສານ ແລະ ໂຄງຮ່າງພື້ນຖານດ້ານເຕັກໂນໂລຢີ່
E-Business ສະໜອງຂະບວນການບໍລິການ ເພື່ອປັບປຸງ, ເສີມຂະຫຍາຍ, ແລກປ່ຽນ ແລະ ສ້າງສາຍສຳພັນກັບບັນດາຜູ້ທີ່ເປັນຫຸ້ນສ່ວນຄົນສຳຄັນ. ສິ່ງນີ້ຮຽກຮ້ອງໃຫ້ມີການນຳໃຊ້ E-Mail, ເວັບໄຊ, ສື່ສານທາງໂທລະພາບ, ອຸປະກອນທາງມືຖື ຫຼື ເຕັກໂນໂລຢີ່ລຸ້ນໃໝ່ ເພື່ອສະນັບສະໜູນ ການບໍລິຫານທຸລະກິດ ເພື່ອການລິເລີມສິ່ງໃໝ່ ໃນປະຈຸບັນ ແລະ ອານາຄົດ.
- ວັດທະນະທຳ
ວັດທະນະທຳກໍ່ສຳຄັນເຊັ່ນດຽວກັນ ເພາະມັນກ່ຽວພັນເຖິງ ຄະນະນຳຂອງອົງການຈັດຕັ້ງໃດໜຶ່ງ ຕ້ອງໄດ້ໃສ່ໃຈພິຈາລະນາ ແລະ ນຳ ພາ. ຕາມທຳມະດາແລ້ວ, ແຕ່ລະອົງການ ໄດ້ພັດທະນາແບບແຜນວິທີເຮັດວຽກຂອງຕົນເອງ ຫຼື ເອີ້ນວ່າ ຂະບວນການເຮັດວຽກ ແລະ ບັນທຶກເປັນຕົວແບບຂອງການດຳເນີນງານ ເຊິ່ງລວມມີກິດຈະກຳ ແລະ ກຳລັງພົນ ຕ້ອງຈັດໃຫ້ຖືກຕາມພາລະບົດບາດຂອງໃຜມັນ. ຖ້າວ່າ ອົງການຈັດຕັ້ງ ຕ້ອງການເພີ່ມສະມັດຕະພາບ ໃນການເຮັດວຽກ ໂດຍຕ້ອງການໃຫ້ E-Business ເຂົ້າມາປ່ຽນແປງ, ມັນຈຳເປັນຕ້ອງດັດແກ້ວິທີ ທີ່ເຮັດມາແຕ່ເກົ່າ ແລະ ປ່ຽນຂະບວນການຕ່າງໆ.
ການປ່ຽນແປງຂະບວນການດັ່ງທີ່ກ່າວມານີ້ ຈະເຮັດໃຫ້ໄດ້ຮັບຜົນໃນວົງກວ້າງສຳລັບວັດທະນະທຳທີ່ມີຢູ່ ໃນປະຈຸບັນຂອງບໍລິສັດທ່ານ, ເຊັ່ນວ່າ: ກົດລະບຽບ, ຄວາມເຊື່ອ, ຫຼັກການ ແລະ ພຶດຕິກຳທີ່ມີຕໍ່ ສິ່ງທີ່ບໍລິສັດ ແລະ ອົງການຈັດຕັ້ງໄດ້ເຄີຍປະຕິບັດມາ. ໂດຍສະເພາະ ການນຳສະເໜີ ຮູບແບບການນຳໃຊ້ E-Business ເພື່ອບັນລຸ ຈຸດປະສົງ, ເສີມສ້າງຄວາມຫຼາກຫຼາຍຂອງຂ່າວສານ. ໃນຂະນະດຽວກັນກໍ່ເພີ່ມໂອກາດໃຫ້ທຸລະກິດຂອງທ່ານອອກສູ່ສາຍຕາມະຫາຊົນ ແລະ ພັກດັນໃຫ້ການຄ້າມີການໂຕ້ຕອບແລກປ່ຽນນຳກັນຫລາຍຂຶ້ນ. ເຊິ່ງຈະເປັນຜົນໂດຍກົງໃຫ້ແກ່ຄົນ ແລະ ກົດເກນການເຮັດວຽກຕ່າງໆຈະມີການປັບປຸງໄວຂຶ້ນ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
