ຄິດກ່ອນເຮັດ

ກ່ອນຈະຕັດສິນໃຈເຮັດທຸລະກິດ, ທ່ານຕ້ອງໄດ້ຄົ້ນຄິດໃຫ້ຖີ່ຖ້ວນ. ການເບິ່ງປັດໃຈຕ່າງໆ ບໍ່ໄດ້ໝາຍວ່າສ້າງເຮັດ ໃຫ້ຕົນເອງເກີດມີຄວາມຢ້ານກັບສິ່ທີ່ທ່ານຍັງບໍ່ພ້ອມ. ຮູບແບບການຕີລາຄາຄວາມພ້ອມ ແລະ ເງື່ອນໄຂການ ເຮັດທຸລະກິດ ເປັນບາດກ້າວໃຫ້ທ່ານ ເຫັນຈຸດແຂງ ແລະ ຈຸດອ່ອນທີ່ຕ້ອງໄດ້ຮັບມື.

ການປະເມີຄວາມພ້ອມພາຍໃນຕົວເອງ ເປັນສິ່ງຈຳເປັນຫຼາຍທີ່ສຸດ. ຫຼາຍກວ່າປັດໃຈທາງນອກ. ສິ່ງທີ່ທ່ານຕ້ອງໄດ້ເບິ່ງມີຄື:

1. ຄວາມຕັ້ງໃຈ- ຄວາມເດັດດ່ຽວ ໃນການເຮັດທຸລະກິດນັ້ນໆ ເປັນປັດໃຈ ຫຼັກທີ່ເຮັດໃຫ້ທຸລະກິດສຳເລັດ. ເພາະທ່ານຈະເຕັມໃຈເຮັດຢ່າງສຸດໃຈ, ສຸມທັງແຮງກາຍ ແລະ ສະຕິປັນຍາ ໃນການຄົ້ນຄິດ.
2. ແຮງຈູງໃຈ – ໃຫ້ຄົນຫາວ່າເປັນຫຍັງຕົນເອງຕ້ອງເຮັດທຸລະກິດນີ້. ໃຫ້ເຫັນແຮງຈູງໃຈຫຼາຍກວ່າຜົນກຳໄລ. ລອງນັ່ງຄິດເບິ່ງ ປັດໃຈແຮງຈູງໃຈທີ່ບໍ່ແມ່ນການເງີນໃຫ້ຫຼາຍທີ່ສຸດ. ເວລາທີ່ທ່ານມີບັນຫາ ແມ່ນໃຫ້ຄິດຫາແຮງບັນດານໃຈເຫຼົ່ານັ້ນ.
3. ຄວາມຊື່ສັດ – ຢ່າໄດ້ຄິດວ່າການເຮັດທຸລະກິດ ແມ່ນການຕົ້ມຕົວະຄົນເພື່ອໃຫ້ໄດ້ເງິນມາ. ທ່ານສາມາດ ຕົ້ມຄົນ ໄດ້ບໍ່ຫຼາຍຄັ້ງ. ເມື່ອຄົນຮູ້ທາດແທ້, ຄົນຈະບໍ່ຫຼົງເຊື່ອທ່ານອີກ. ທ່ານຈະຕ້ອງເສຍຊື່ສຽງ ແລະ ສາຍສຳພັນກັບຄົນໃນສັງຄົມ ຈົນເຮັດໃຫ້ທ່ານບໍ່ສາມາດເຮັດທຸລະກິດອື່ນໆໄດ້. ໃຜລະຈະມັກ ໃຫ້ຄົນມາ ຕົວະ, ແລະ ໃຜລະ ຈະໃຫ້ຄົນຕົວະຊໍ້າໆອີກ?
4. ຄວາມສ່ຽງ – ທຸກໆທຸລະກິດຈະມີຄວາມສ່ຽງແຕກຕ່າງກັນ. ການຮັບຮູ້ຄວາມສ່ຽງ ບໍ່ແມ່ນໃຫ້ທ່ານຕ້ອງ ຢ້ານ ແລະ ເຊົາເຮັດທຸລະກິດນັ້ນ. ເມື່ອເຫັນຄວາມສ່ຽງຫຼາຍເທົ່າໃດ, ທ່ານກໍ່ຈະໄດ້ເບິ່ງວິທີໃນການບໍລິ ຫານຄວາມສ່ຽງ ແລະ ສ້າງແຜນງານຫຼຸດຜ່ອນຄວາມສ່ຽງເຫຼົ່ານັ້ນ. ໃນບາງທຸລະກິດ, ເຖິງຈະມັກຫຼາຍປານໃດກໍ່ຕາມ, ຫຼື ມີແຮງບັນດານໃຈສູງຫຼາຍ ຫາກທ່ານເຫັນຄວາມສ່ຽງສູງ ແລະ ບໍ່ສາມາດແກ້ໄຂມັນໄດ້ດ້ວຍຕົນເອງ ຫຼື ຄົນອ້ອມຂ້າງ, ທ່ານຄວນພິຈາລະນາວ່າຈະເຮັດດີບໍ່? ເປັນຕົ້ນ ການຄ້າຂາຍພືດກະສິກຳ. ຫາກປັດໃຈລາຄາບໍ່ຄົງຕົວ, ປະຊາຊົນ ບໍ່ສົນໃຈປູກພືດຊະນິດນັ້ນໆ, ຈະເຮັດໃຫ້ການເກັບຊື້ຜົນຜະລິດຢາກຫຼາຍ.
5. ເປັນຜູ້ນຳ – ພາວະການເປັນຜູ້ນຳສຳຄັນຫຼາຍ. ທຸກໆການຕັດສິນໃຈຂື້ນກັບທ່ານ. ການເອົາຊະນະ ຄວາມສ່ຽງ, ການກະຕຸ້ນທີມງານ ແລະ ການສ້າງທີມ ເປັນຕົ້ນ. ທັກສະເຫຼົ່ານີ້ ເປັນທັກສະທີ່ທ່າຈະຕ້ອງໄດ້ເຝິກ.
6. ມະນຸດສຳພັນ – ການເຮັດທຸລະກິດທ່ານຕ້ອງໄດ້ຮ່ວມມືກັບຫຼາຍໆພາກສ່ວນ. ທັກສະໃນການ ເວົ້າຈາກັບພະນັກງານຕົນເອງ, ຫົວໜ້າອົງການຕ່າງໆ, ແລະ ສຳຄັນສຸດແມ່ນກຫບລູກຄ້າຕົນເອງ ເປັນສິ່ງທີ່ສຳຄັນຫຼາຍ. ຫາກເວົ້າຈາ ບໍ່ດີ, ຄົນອາດບໍ່ສັດທາ ແລະ ໃຫ້ຄວາມນັບຖື.
7. ຄວາມຄິດສ້າງສັນ – ບໍ່ມີທຸລະກິດໃດຖືກອອກແບບໃຫ້ສຳເລັດ. ທ່ານອາດຮຽນຮູ້ໄດ້ຈາກຫຼາຍ ໆປະສົບການ. ການເຮັດຕົວຈິງ ທ່ານຈະພົບຫຼາຍໆບັນຫາ. ຮູບແບບການແກ້ໄຂແບບສ້າງສັນ ຈະເປັນຕົວພັກດັນສູ່ຄວາມສຳເລັດ.
8. ຄວາມຮູ້ກ່ຽວກັບທຸລະກິດທີ່ເຮັດ – ຫຼາຍຄົນເຫັນປັດໃຈການເງິນເປັນຫຼັກ ເລີຍລືມໄປວ່າ ຕົນເອງຖະໜັດວຽກນັ້ນ. ເມື່ອເຮັດຕົວຈິງໄປ ກະເລີຍບໍ່ສາມາດພັດທະນາທັກສະ ແລະ ແກ້ໄຂບັນຫາທີ່ເກີດຂື້ນສະເພາະໜ້າ. ຈຳເປັນຫຼາຍ ທ່ານຕ້ອງມີທັກສະໃດໜຶ່ງ ຫຼື ຕ້ອງໄດ້ຮຽນຮູ້ພໍສົມຄວນ ຈາກຕົວຈິງ.

ກ່ອນຈະເຫັນຕົວຕົນເອງທີ່ແທ້ຈິງ, ເຮົາຕ້ອງເປີດໃຈໃຫ້ຫຼາຍທີ່ສຸດ. ເພື່ອໃຫ້ສາມາດຕອບຄຳຖາມທີ່ຍົກຂື້ນມາ ຂ້າງເທິງນັ້ນໄດ້. ສິ່ງທີ່ຍົກມາຂ້າງເທິງ, ປັດໃຈການບໍລິຫານຄວາມສ່ຽງສຳຄັນຫຼາຍ. ຫາກທ່ານບໍ່ສາມາດແກ້ ໄຂບັນຫາທີ່ຈະເກີດຂື້ນ ດ້ວຍວິທີສ້າງສັນ ທ່ານກໍ່ຈະບໍ່ສາມາດນຳພາທຸລະກິດ ສູ່ຄວາມສຳເລັດໄດ້.