ການສື່ສານຈະເປັນອັນອື່ນບໍ່ໄດ້ນອກຈາກ ບົດຄວາມ, ສຽງ, ຮູບພາບ ແລະ ວີດີໂອ. ບໍ່ວ່າການເວລາຈະປ່ຽນໄປ ເຄື່ອງມືໃນການສື່ສານ ເປັນຕົ້ນ ສື່ສັງຄົມອອນໄລ ໄດ້ກາຍເປັນເຄື່ອງມືທີ່ສຳຄັນໃນການສື່ສານ ໃນທຸກໆຂົງເຂດ ເຊັ່ນ: ທຸລະກິດ, ການຄ້າ, ການເມື່ອງ, ການທ່ອງທ່ຽວ ແລະ ການສຶກສາ ເປັນຕົ້ນ. ຮູບແບບການສື່ສານ ດ້ວຍເຕັກ ໂນໂລຍີທັນສະໃໝ ຍັງບໍ່ສາມາດປະຕິເສດເຕັກນິກການສ້າງເນື້ອໃນ ເພື່ອນຳກະຈາຍອອກສູ່ສັງຄົມ ຜ່ານເຄື່ອງມື ສື່ສານດິຈິຕໍ ຫຼາກຫຼາຍຮູບແບບ.
ສຳລັບວຽກງານການຄ້າຂາຍ, ການໂຄສະນາຜ່ານທາງສື່ສັງຄົມອອນໄລ ເປັນສິ່ງຈຳເປັນຫຼາຍ. ຄຳເວົ້າທີ່ວ່າ “ຂອງດີ ບໍ່ຈຳເປັນໂຄສະນາ” ແມ່ນເປັນການປະຕິເສດ ຮູບແບບການປະຊາສຳພັນ ແກ່ລູກຄ້າເປົ້າໝາຍ ທີ່ທ່ານສາມາດເຮັດ ໄດ້ງ່າຍຂື້ນ, ປະຫຍັດຂື້ນ ແລະ ບໍ່ຕ້ອງການງົບປະມານຫຼາຍຄືການໂຄສະນາຜ່ານທາງ ໂທລະພາບ, ວາລະສານ ແລະ ປ້າຍໂຄສະນາ ຕາມທາງ. ໃຜໆກະຂຽນໄດ້ ແຕ່ຈະຂຽນ ແນວໃດແບບມີຫົວຄິດປະດິດສ້າງ ໃຫ້ຄົນສົນ ໃຈຢາກອ່ານ; ໃຜໆກະຖ່າຍພາບໄດ້ ແຕ່ຈະຖ່າຍພາບແນວໃດ ໃຫ້ຄົນຢາກເບິ່ງ; ໃຜໆກະສ້າງວີດີໂອໄດ້ ແຕ່ຈະ ເຮັດແນວໃດໃຫ້ຄົນຢາກເບິ່ງ. ເຕັກນິກການສ້າງເລື່ອງໂຄສະນາ ໃນຫຼັກສູດນີ້ໄດ້ແນະນຳ ເຕັກນິກທີ່ຈຳເປັນ ແກ່ການສ້າງບົດຄວາມ, ສ້າງຮູບພາບ ແລະ ຄົ້ນຄິດສ້າງເລື່ອງຜ່ານທາງວີດີໂອໄດ້ ແບບງ່າຍດາຍ.
ທ່ານຈະບໍ່ໄດ້ຮຽນແຕ່ວິທີສ້າງເນື້ອໃນການຕະຫຼາດເທົ່ານັ້ນ, ຍັງມີເຕັກນິກການສ້າງຍຸດທະສາດ ເນື້ອໃນການຕະ ຫຼາດ, ການສ້າງແຜນງານປະຕິບັດໄດ້ຕົວຈິງ, ການກຳນົດ ກຸ່ມຄົນທີ່ເປັນລູກຄ້າເປົ້າໝາຍ ແລະ ການເຮັດວຽກ ດ້ານ ເນື້ອໃນການຕະຫຼາດແບບມືອາຊີບ. ທີ່ສຳຄັນ, ຈະມີເຕັກນິກການປະເມີນຜົນການເຮັດວຽກ ເພື່ອໃຫ້ທ່ານສາມາດ ນຳມາດັດປັບແຜນການເຮັດວຽກ ໃນຕໍ່ໜ້າ ເພື່ອໃຫ້ສາມາດເຂົ້າຫາກຸ່ມຄົນເປົ້າໝາຍໄດ້ດີຂື້ນໄປອີກ. ຄົງບໍ່ມີໃຜເປັນຄົນສອນທ່ານໄດ້ດີກວ່າຕົວທ່ານເອງ. ເຊື່ອແນ່ວ່າ ເຕັກນິກທີ່ທ່ານຈະໄດ້ຮັບໃນຫຼັກສູດນີ້ ແມ່ນເປັນ ແນວທາງໃຫ້ທ່ານສາມາດເປັນນຳໃຊ້. ເພື່ອໃຫ້ເກີດຜົນດີແບບກ້າວໜ້າ, ທ່ານຈະຕ້ອງໄດ້ສືບຕໍ່ດັດປັບ ແຜນເຮັດ ວຽກ ເພື່ອໃຫ້ໄດ້ຕາມເປົ້າໝາຍທີ່ກຳນົດໄວ້.