ມີຫຼາຍຄົນນິຍາມກ່ຽວກັບແຜນທຸລະກິດ. ໃນຂໍນິຍາມວ່າ: ແຜນທຸລະກິດຄືເປົ້າໝາຍອັນຊັດເຈນຂອງທຸລະກິດ. ເຊິ່ງປະກອບມີລາຍລະອຽດກ່ຽວກັບຈຸດປະສົງການດຳເນີນງານຂອງທຸລະກິດ ແລະ ວິທີສ້າງກຳໄລ.
ແຜນທຸລະກິດຈະຊ່ວຍຫຍັງທ່ານໄດ້ແດ່?
ແຜນທຸລະກິດຈະເນັ້ນໄປທີ່ເປົ້າໝາຍຂອງທຸລະກິດ. ມັນຈະຊ່ວຍໃຫ້ທ່ານສາມາດດຳເນີນວຽກງານຕາມແຜນການໃນອານາຄົດ, ເພາະທຸກໆຢ່າງແມ່ນໄດ້ວາງແຜນໃນການດຳນີນງານໄວ້ກ່ອນໜ້ານີ້ແລ້ວ. ແນ່ນອນເມື່ອກິດຈະກຳຖືກຄາດເດົາໄວ້ກ່ອນໜ້າ, ທ່ານຈະສາມາດກຳນົດງົບປະມານ ແລະ ຄາດເດົາເງີນໜູນວຽນທີ່ຕ້ອງການໃນການເຮັດທຸລະກິດ ເຊິ່ງຈະເຮັດໃຫ້ທ່ານສາມາດດຳເນີນທຸລະກິດໄປສູ່ເປົ້າໝາຍທີ່ຕັ້ງໄວ້. ໃນແຜນທຸລະກິດກິດຈະຊ່ວຍໃຫ້ທ່ານສາມາດຄາດຄະເນສິ່ງທີ່ທ່ານຕ້ອງໄດ້ປັບປຸງ, ຂໍການຮ່ວມມື ແລະ ການເຝິກອົບຮົມທັກສະຕ່າງໆໃຫ້ແກ່ທີມງານ ເພື່ອກ້າວສູ່ຄວາມສຳເລັດທາງທຸລະກິດ.
ແຜນທຸລະກິດສຳຄັນກັບວຽກງານອື່ໆແນວໃດແດ່?
ແຜນທຸລະກິດສຳຄັນໃນເວລາທີ່ທ່ານຕ້ອງການເຂົ້າສູ່ການເງິນເພື່ອກູ້ຢືມ ຫຼື ຄູ່ຮ່ວມທຶນ. ເຂົາຈະອ່ານບົດສັງລວມກ່ຽວກັບທຸະລະກິດ ຜ່ານແຜນທຸລະກິດຂອງທ່ານ ແລະ ຈະພິດຈາລະນາປະສິດທິຜົນຂອງທຸລະກິດຜ່ານການນຳສະເໜີໃນແຜນດັ່ງກ່າວ. ແນ່ນອນເຂົາເຈົ້າອາດຕັ້ງຄຳຖາມຫຼາຍອັນໃນຈຸດທີ່ສົງໃສ ແລະ ທ່ານຕ້ອງໄດ້ຕອບຄຳຖາມພ້ອມດ້ວຍຄຳຕອບທີ່ໜ້າເຊື່ອຖືເພື່ອໃຫ້ໄດ້ຮັບການສະໜັບສະໜູນທາງການເງິນ. ແຜນທຸລະກິດຈະເປັນເຄື່ອງມືໃນການສ້າງມະໂນພາບທຸລະກິດທັງໝົດແລະສ້າງມະໂນພາບໃຫ້ແກ່ທ່ານສາມາດມີແນວທາງໃນການຕອບທຸໆກຄຳຖາມແກ່ນັກການເງິນ.
ເລີ່ມເບິ່ງນຳກັນວ່າ ຈະເລີ່ມແຜນທຸລະກິດໄດ້ແນວໃດ?
ຮູບແບບການຂຽນແຜນທຸລະກິດມີຫຼາຍໂຄງຮ່າງ. ບາງທະນາຄານມີໂຄງຮ່າງສະເພາະໃຫ້ແກ່ບັນດາທຸລະກິດ ໄດ້ສ້າງຂື້ນເພື່ອຂໍການສະໜັບສະໜູນທາງການເງິນ. ໃນນີ້, ສັງລວມເອົາອົງປະກອບໃນແຜນທຸລະກິດທີ່ມັກຖືກຖາມ ເພື່ອເປັນແນວທາງໃຫ້ແກ່ທ່ານສາມາດນຳໄປຂຽນ ແລະ ດັດປັບໃຫ້ເຂົ້າກັບທຸລະກິດຂອງທ່ານໄດ້ດ້ວຍຕົນເອງ.
ຈຸດປະສົງຫຼັກຂອງຫຼັກສູດນີ້ ກໍ່ເພື່ອເນາະນຳໃຫ້ບັນດາທ່ານສາມາດເລີ່ມຂຽນແຜນທຸລະກິດເບື້ອງຕົ້ນໄດ້ດ້ວຍຕົວເອງ.
ທຸກໆຫົວຂໍ້ທີ່ແນະນຳໃນຫຼັກສູດນີ້ ບັນຈຸເອົາສິ່ງຈຳເປັນທີ່ສຸດ ທີ່ທ່ານຄວນນຳໃຊ້ເຂົ້າໃນການສ້າງເປັນແຜນທຸລະກິດ. ແຜນທຸລະກິດທີ່ທ່ານຈະສ້າງຂື້ນຈາກການສຶກສາຫຼັກສູດນີ້ ຈະເຮັດໃຫ້ທ່ານສ້າງແຜນທຸລະກິດກາຍເປັນແຜນການທີ່ສາມາດນຳໃຊ້ໄດ້ຕົວຈິງ ແລະ ແທດເໜາະກັບທຸລະກິດທີ່ມີເອກະລັກສະເພາະຕົວ.
ບໍ່ມີສິ່ງທີ່ສົມບູນແບບ
ເນື່ອງຈາກສະພາບສັງຄົມມີການປ່ຽນແປງໄວຫຼາຍ, ແຜນທຸລະກິດຂອງທ່ານກໍ່ອາດມີຄວາມຈຳເປັນຕ້ອງໄດ້ດັດປັບ. ແນ່ນອນທ່ານສາມາດດັດປັບ ແລະ ປ່ຽນແປງໃຫ້ແທດເໜາະຕາມແຕ່ລະໄລຍະ ໂດຍການນຳໃຊ້ຂໍ້ມູນແນະນຳເບື້ອງຕົ້ນນີ້.
ທ່ານຕ້ອງໄດ້ໜັ່ນສຶກສາເພື່ອນຳໃຊ້ເຕັກນິກການຂຽນດັ່ງກ່າວເຂົາໃນການດັດປັບແຜນທຸລະກິດໃຫ້ເໜາະສົມ. ເປັນຕົ້ນແມ່ນເຕັກນິກການຕະຫຼາດ ເພື່ອໃຫ້ສາມາດສ້າງການຂາຍ ແລະ ເຂົ້າສູ່ລູກຄ້າກຸ່ມໃໝ່ໆ. ແຜນທຸລະກິດທີ່ສົມບູນແບບ, ຄົງຈະບໍ່ມີ. ການສ້າງແຜນທຸລະກິດແມ່ນເນັ້ນໃຫ້ ສາມາດສ້າງຜົນກຳໄລຈາກການດຳເນີນທຸລະກິດ. ເພື່ອໃຫ້ໄດ້ແນວນັ້ນ, ທ່ານກໍ່ຕ້ອງໄດ້ຄົ້ນຄິດນຳໃຊ້ຫຼາຍໆທັກສະເຂົ້າໃນຊ່ວງການສ້າງແຜນ ແລະ ການດຳເນີນງານຕົວຈິງ.
ດັ່ງທີ່ກ່າວໄວ້ແລ້ວວ່າ, ແຜນທຸລະກິດທີ່ດີ ຄືແຜນທຸລະກິດທີ່ສ້າງຜົນກຳໄລ. ໂດຍພື້ນຖານ, ຄຸນລັກສະນະຂອງແຜນທຸລະກິດທີ່ດີ ຕ້ອງຕອບຄຳຖາມ ເປັນຢ່າງຕໍ່າໃນຂົງເຂດດັ່ງຕໍ່ໄປນີ້:
- ປະເພດທຸລະກິດທີ່ທ່ານຕ້ອງການລົງທຶນແມ່ນອັນໃດ?
- ໃຜຄືລູກຄ້າ ແລະ ເປັນຫຍັງເຂົາຈິ່ງສົນໃຈໃນການຊົມໃຊ້ຜະລິດຕະພັນແລະການບໍລິການຂອງທ່ານ?
- ລູກຄ້າຈະສາມາດຊອກຫາກ່ຽວກັບທຸລະກິດຂອງທ່ານໄດ້ແນວໃດ?
- ໃຜແດ່ທີ່ສະໜອງສິນຄ້າແລະການບໍລິການທີ່ຄ້າຍໆຄືທ່ານ? ທ່ານກຳລັງແຂ່ງກັບໃຜ?
- ຄົນໃນທີມງານຂອງທ່ານໄດ້ຮັບການເຝິກອົບຮົມ ຫຼື ມີປະສົບການໃນການສະໜອງການບໍລິການຫຼືການຜະລິດສິນຄ້າແລ້ວບໍ່?
- ທ່ານມີພ້ອມປັດໃຈການຜະລິດ, ຫຼື ຍັງຂາດອັນໃດແດ່ເພື່ອນຳໃຊ້ເຂົ້າໃນການຈັດຕັ້ງປະຕິບັດ – ຫຼື ທ່ານຈະຊອກຫາເພີ່ມເຕີມທີ່ໃດແດ່?
ພາຍຫຼັງການສ້າງແຜນແລ້ວ, ການເນາະນຳກ່ຽວກັບແຜນທຸລະກິດ ໃຫ້ຄົນອື່ນ ພາຍໃນທີມຮູ້ຈັກ ເປັນການສ້າງໃຫ້ເຂົາເຈົ້າມີຄວາມກຽມພ້ອມ ແລະ ທຸ້ມເທ. ສິ່ງທີ່ທ່ານຄົ້ນຄິດໃນແຜນ ຈະເປັນການເຮັດໃຫ້ແຕ່ລະໜ່ວຍງານ ສ້າງກິດຈະກຳ ໃນການດຳເນີນງານ ເພື່ອຜົນປະໂຫຍດທາງທຸລະກິດ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
