ເກືອບເປັນເວລາ 100 ປີ ກ່ອນການປະຕິຫວັດຊາດ 1975, ບັນພະບູຣຸດຄົນລາວໄດ້ເກີດມາເພື່ອຕໍ່ສູ້ ໃຫ້ຊາດລາວເປັນອິດສະຫຼະພາບຈາກການຂູດຮີດ ແລະ ມອບຜືນແຜນດິນ ແກ່ຄົນລາວຄົນລຸ້ນປະຈຸບັນໄດ້ສ້າງສາ ແລະ ສືບສານປະເພນີ.ການປະຕິຫວັດຊາດ, ໄດ້ນຳເອົາສິດເປັນເຈົ້າປະເທດຊາດມາສູ່ຄົນລາວຢ່າງເຕັມຕົວ. ຂັບໄລ່ການກົດຂີ່ຂູດຮີດຂອງເຈົ້າລ່າອານານິຄົມອອກຢ່າງບໍ່ມີວັນຈະຫວນກັບມາ. ທຸກໆອຳນາດການຕັດສິນໃຈ ໃນວຽກງານບໍລິຫານ ແຕ່ສູງສຸດຮອດຂັ້ນລຸ່ມ ໃນຂອບເຂດທົ່ວປະເທດ ຂື້ນກັບການນຳພາຂອງຄົນລາວ. ຈິ່ງເວົ້າໄດ້ວ່າ: ສະຕາກຳຂອງວຽກງານການພັດທະນາຂື້ນກັບໝາກຜົນການເຮັດວຽກຂອງຄົນລາວໃນຍຸກນີ້.
ວັນຊາດປີ 2018, ພໍດີຄົບຮອບ 43 ປີ ຂອງການປົດປ່ອຍປະເທດ. ສ ປ ປ ລາວ ຍັງຖືກຈັດໃນກຸ່ມປະເທດດ້ອຍພັດທະນາໃນໂລກ. ການນໍາພາປະເທດອອກຈາກຄວາມດ້ອຍພັດທະນາ ກາຍເປັນເຄື່ອງທົດສອບຄວາມສາມາດ ແລະ ສາມັກຄີຂອງຄົນລາວຍຸກໃໝ່ທຸກໆຄົນ. ຮຽກຮ້ອງໃຫ້ຄົນທຸກໆສາຂາອາຊີບ ແລະ ຄົນລາວທຸກໆຊົນເຜົ່າ ຕ້ອງໄດ້ອອກແຮງທຸ້ມເທ ແລະ ເສຍສະຫຼະໃນວຽກງານສ້າງສາ. ປາດສະຈາກຄວາມອຸດສາຫະຂອງຄົນລາວ ຄືດັ່ງສະໃໝປະຕິຫວັດຊາດ, ພາລະກິດການພັດທະນາຊາດຄົງບໍ່ໄດ້ຮັບໝາກຜົນ ໃນປີ 2024.
ຕະຫຼອດໄລຍະການປົດປ່ອຍຊາດ, ໄດ້ເກີດມີວິຣະຊົນຜູ້ກ້າ. ບໍ່ແມ່ນພຽງແຕ່ກຸ່ມໃດໜຶ່ງ ຫາກແມ່ນຄົນລາວທຸກໆຊົນຊາດຊົນເຜົ່າຮ່ວມກັນ. ພາຍໃຕ້ການນຳພາຂອງພັກ-ລັດ. ຮູບແບບການຕໍ່ສູ້ຂອງບັນພະບູຣຸດລາວ, ເມື່ອເຮົານຳເອົາມາເປັນແບບຢ່າງໃນການຈັດຕັ້ງປະຕິບັດໜ້າທີ່ໃນຍຸກປະຈຸບັນ, ພວກເຮົາຈະສາມາດຄົ້ນຄິດວິທີການພັດທະນາແບບໃໝ່ ແລະ ເອົາຊະນະສິ່ງທ້າທາຍທີ່ກີດຂວງ.
43 ປີ ຂອງການພັດທະນາ, ເບິ່ງຄືວ່າດົນເກີນໄປ. ເມື່ອຫວນເບິ່ງການປະຕິຫວັດຊາດ, ຕ້ອງໄດ້ໃຊ້ເວລານັບ 100 ປີ, ຈາກລຸ້ນສູ່ລຸ້ນ. ຄວາມໝາຍການມີຊີວິດ ຂອງຄົນລາວ ໃນຍຸກປະຈຸບັນ, ແມ່ນຮຽກຮ້ອງໃຫ້ພວກເຮົາໄດ້ສືບຕໍ່ວຽກງານການສ້າງສາພັດທະນາໃຫ້ຈະເລີນກ້າວໜ້າ ແລະ ອອກຈາກປະເທດດ້ອຍພັດທະນາ. ໃນຍຸກກ່ອນ, ສັງຄົມໄດ້ຈາລຶກບຸນຄຸນບຸກຄົນ ແລະ ຄອບຄົວທີ່ຍອມເສຍຊິວິດລູກຮັກຫຼານແພງຂອງຕົນເພື່ອການປະຕິຫວັດຊາດ. ສຳລັບຍຸກນີ້, ສັງຄົມພ້ອມທີ່ຈະຈົດຈຳນັກວິທະຍາສາດ, ນັກທຸລະກິດຜູ້ສ້າງຜົນກຳໄລແກ່ຕົນເອງ ທັງສ້າງຄຸນຄ່າແກ່ສັງຄົມ ແລະ ຜູ້ສ້າງນະວັດຕະກຳໃໝ່, ນາຍໝໍອັດສະລີຍະຊ່ວຍຊີວິດ, ພະນັກງານຜູ້ຫ້າວຫັນ, ນາຍຄູຜູ້ຮອບຮູ້, ຜູ້ບໍລິຫານທີ່ດີເລີດ ແລະ ອີກຫຼາຍໆສາຂາອາຊີບ. ຫາກທ່ານຝາກຄວາມເປັນເລີດ ຜ່ານສາຂາອາຊີບຕົນເອງຮັບຜິດຊອບ ສັງຄົມຈະບໍ່ມີວັນຈະລື່ມຜົນງານທີ່ທ່ານປະຕິບັດຕະຫຼອດການມີຊີວິດ.
ປະຈຸບັນ, ຫຼາຍໆວຽກງານເສດຖະກິດ-ສັງຄົມ ໃນປະເທດເຮົາຍັງນອນໃນແຖວຫຼັງເມື່ອທຽບກັບປະເທດອື່ນໆ. ຈົນເຮັດໃຫ້ຄົນລາວອາດເກີດມີຄວາມນ້ອຍໜ້າ-ນ້ອຍໃຈ, ບໍ່ມີຄວາມພູມໃຈ ແລະ ສົງໃສກັບຄວາມເປັນລາວ, ເພາະບໍ່ມີແນວເອກອ້າງຄວາມກ້າວໜ້າເທົ່າປະເທດອື່ນ. ຄົນລາວຍຸກນີ້, ຍັງບໍ່ແມ່ນຍຸກ ການສະແດງຄວາມສຳເລັດໃນວຽກງານການພັດທະນາເທື່ອ. ຄວາມໝາຍຂອງການມີຊີວິດຂອງຄົນລາວຍຸກນີ້: ຄືການເກີດມາເພື່ອສ້າງຄຸ່ນຄ່າແກ່ສັງຄົມຮ່ວມກັນເພື່ອຄົນລຸ້ນນີ້ແລະລຸ້ນໜ້າ. ພວກເຮົາທຸກໆຄົນທີ່ມີຊີວິດຮ່ວມກັນບົນຜືນແຜນດິນອັນອຸດົມສົມບູນໃນທີ່ນີ້, ບໍ່ຄວນປ່ອຍໜ້າທີ່ອັນສຳຄັນດັ່ງກ່າວແກ່ຄົນລຸ້ນຕໍ່ໄປ, ຫາກຕ້ອງໄດ້ອອກແຮງທັງກາຍ ແລະ ສະຕິປັນຍາເພື່ອຄວາມກ້າວໜ້າຂອງຕົນເອງ ກໍ່ຄືສັງຄົມໃຫ້ສຳເລັດໃນປີ 2024 ແລະ ຕໍ່ໆໄປ.
ທຸກໆການເສຍສະຫຼະຕໍ່ພາລະກິດນຳພາອອກຈາກຄວາມທຸກຈົນ ເປັນວຽກງານອັນຊົງກຽດທີ່ຄົນລາວເຮົາຄວນພູມໃຈ; ເພາະນັ້ນໝາຍເຖິງການເສຍສະຫຼະຂອງພວກເຮົາທັງໝົດໃນຊາດ ແກ່ຜືນແຜນດິນເກີດ ແລະ ສຸມທຸກລົມຫາຍໃຈເພື່ອການພັດທະນາ ພາຍໃຕ້ການນຳພາຂອງພັກປະຊາຊົນປະຕິຫວັດລາວ ຜູ້ທີ່ຈະນຳພາຮູບແບບການພັດທະນາລໍ້າສະໄໝ ແບບໃໝ່ສູ່ສັງຄົມລາວ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
