ບໍ່ມີຫຍັງເປັນຂອງເຮົາ, ຫຼື ເຮົາບໍ່ໄດ້ເປັນເຈົ້າຂອງຊີວິດໃຜ, ເຮົາມາພົບ ແລະ ກະຈາກ. ຄຳເວົ້າຂອງພະພຸດທະເຈົ້າ ປະເພດແນວນີ້ຄືແມ່ນຕົວຈິງຫຼາຍ. ການຈາກລາ ມີຄຸນຄ່າທີ່ເຊື່ອງຊ້ອນຢູ່ໃນຄວາມສູນເສຍ. ລອງເປີດໃຈເບິ່ງ.
ພວກເຮົາຄວນຮຽນຮູ້ຈັກຮຽນຮູ້ຄຸນຄ່າຂອງການຈາກລາ, ທັງໃນຕອນຈາກເປັນ ແລະ ຈາກຕາຍ. ເພາະຄວາມສູນເສຍ ຖືວ່າເປັນສິ່ງທີ່ເຮົາຕ້ອງໃສ່ໃຈທີ່ຈະເຮັດຄວາມເຂົ້າໃຈຢູ່ສະເຫມີ. ເພື່ອວັນຫນຶ່ງທຸກໆຢ່າງປ່ຽນໄປ ແລະ ບໍ່ໄດ້ດັ່ງຫວັງ. ເຮົາຍ່ອມພ້ອມທີ່ຈະຍອມຮັບດ້ວຍໃຈທີ່ເປັນກາງ ແລະ ພ້ອມຈະທຳຄວາມຮູ້ຈັກກັບສິ່ງໃຫ່ມໆທີ່ຈະເກີດຕາມມາໄດ້ຢ່າງລົງຕົວ.
ການທີ່ເຮົາຈະຮູ້ຈັກວ່າສິ່ງໃດມີຄ່າ ບາງຄັ້ງຕ້ອງອາໃສການຮຽນຮູ້ທີ່ຂ້ອນຂ້າງຍາວນານ. ມັນເປັນສິ່ງທີ່ຕ້ອງຕິດເກາະບໍ່ໃຫ້ຫ່າງ. ຈຶ່ງຈະເຂົ້າເຖິງຄຸນຄ່າຂອງສິ່ງນັ້ນໆໄດ້. ການເຮັດຄວາມເຂົ້າໃຈໃນຊີວິດກໍເຊັ່ນດຽວກັນ ເຮົາເອງກໍຕ້ອງອາໃສອົງປະກອບຫລາຍໆຢ່າງ ເຂົ້າມາເປັນບົນທົດສອບ ເພື່ອໃຫ້ເຮົາຖືກກະຕຸ້ນທີ່ຈະຕື່ນຂຶ້ນມາເບິ່ງວ່າມີຫຍັງທີ່ຂາດຫາຍໄປຈາກຊີວິດຂອງເຮົາ.
ການຈາກລາ ເປັນຄູສອນຊີວິດທີ່ດີຄົນໜຶ່ງ. ມັນເຮັດໃຫ້ສະຫລາດຂຶ້ນທຸກຄັ້ງ ຫລື ໃຫ້ເຂົ້າໃຈແຈ່ມແຈ້ງ ໃນສັດຈະທຳຫລາຍກວ່າເກົ່າ ເຊິ່ງເປັນສິ່ງທີ່ຜ່ານເຂົ້າມາ ແລ້ວສາມາດກະຕຸກຕົວເຮົາໃຫ້ຮູ້ຈັກຄິດໄດ້ ມັນກໍຄືການຈາກລາຫລືຄວາມພັດພາກ.
ຫາກເບິ່ງຮອບຕົວ ຈະມີການໜູນວຽນເວລາ ແລະ ສິ່ງຂອງຕ່າງໆຫມຸນວຽນປ່ຽນໄປຢູ່ຕະຫລອດເວລາ. ຊີ້ໃຫ້ເຫັນວ່າ ຫາກມີກິດຈະກຳທີ່ກ່ຽວຂ້ອງຈາກການຈາກລາ ຫລື ຄວາມພັດພາກມາຖາມສະບາຍດີເຮົາ, ຄົນມັກຈະໄດ້ຍອມເສຍຢົດນ້ຳຕາ ຄືກັບເປັນການບອກໃຫ້ຮູ້ວ່າ ສິ່ງນັ້ນມີຄວາມຫມາຍຕໍ່ຊີວິດພຽງໃດ? ແຕ່ຖ້າຫາກຮູ້ຈັກເບິ່ງໃຫ້ໄກກວ່ານີ້ ການເບິ່ງເຫັນຄຸນຄ່າຂອງການຈາກລາ ແລ້ວຮູ້ຈັກຊີວິດຂອງຕົວເອງ ແລະ ຄົນທີ່ເຮົາຮັກຢ່າງສະຫນິດໃຈຈະເຫັນໄດ້ວ່າການເຂົ້າເຖິງທຳມະຊາດຂອງຄວາມປ່ຽນແປງ ຄືສິ່ງທີ່ຊ່ວຍເຕືອນສະຕິຂອງເຮົາ ແລະ ກະຕຸ້ນໃຫ້ຊີວິດມີພັດທະນາການທີ່ເຕີບໂຕຢູ່ຕະຫລອດເວລາ.
ເພາະຄວາມຈິງຂອງການປ່ຽນແປງ ບໍ່ວ່າຈະເປັນອາຍຸໄຂທີ່ປ່ຽນໄປ ຄວາມເຈັບໄຂ້ທີ່ມີມາ ຫລື ຄວາມຕາຍ, ມັນສະແດງວ່າ ທຸກຢ່າງໄດ້ຍຸດຕິບົດບາດລົງ. ສິ່ງເຫລົ່ານີ້ຄືການຈາກລາທີ່ເກີດຂຶ້ນຢູ່ທຸກເມື່ອ. ຫາກຮູ້ຈັກເບິ່ງວ່ານີ້ຄືຄູ ການເວລາທີ່ຄອຍສອນເຮົາຢູ່ທຸກຄະນະ ຄົນເຮົາຜູ້ຊື່ວ່າເປັນນັກຮຽນຊີວິດ ກໍຄວນທີ່ຈະເຝົ້າຖາມຕົວເອງໃຫ້ຫລາຍຂຶ້ນ.ເພື່ອໃຫ້ຄູຊ່ວຍຕອບຄຳຖາມຄາໃຈ ໃຫ້ກະຈ່າງແຈ້ງ. ເຊິ່ງຈະເຮັດໃຫ້ເຮົາມີຄວາມພ້ອມ ທີ່ຈະສຶກສາບົດຮຽນທີ່ຍາກຂຶ້ນຕໍ່ໄປ.
ແຕ່ຄົນເຮົາມັກຈະໄດ້ຮັບຄຳຕອບ ກໍຕໍ່ເມື່ອການຈາກລາມາຍູ້ໃຫ້ເກີດການປ່ຽນແປງທີ່ຫນັກຫນ່ວງ ເຊິ່ງເປັນການປ່ຽນຖ່າຍຈາກສິ່ງເກົ່າໆ ເພື່ອໄປຫາສິ່ງໃຫ່ມດ້ວຍວິທີທີ່ຮຸນແຮງ. ຈົນບາງຄັ້ງຍາກເກີນຈະຮັບມືໃຫວ ແລະ ຄວາມຈິງກໍ່ມັກສອນໄວ້ສະເຫມີວ່າ ຕາບໃດທີ່ເຮົາຍັງຈົມຢູ່ກັບຄວາມບໍ່ຮູ້ອີກ ທັ້ງບໍ່ຮູ້ຈັກກະຕຸ້ນເຕືອນຕົວເອງໃຫ້ເປັນນັກສຶກສາຊີວິດທີ່ດີ ຕາບນັ້ນເຮົາກໍຕ້ອງນ້ຳຕາຕົກສະເຫມີທີ່ເຫັນການຈາກລາ.
ເປັນສະເຫມືອນການຕອກຢ້ຳວ່າ ຫາກບໍ່ຮູ້ຈັກໃສ່ໃຈທີ່ຈະເບິ່ງແຍງຊີວິດດ້ວຍຄວາມຮັກ ເຮົາກໍຄົງຕ້ອງຕົກເປັນເຍື່ອຂອງຊີວິດ ໂດຍມີຄວາມພັດພາກຄອຍຫລອກຫລອນຈົນວັນຕາຍສະເຫມີ. ເພາະຊີວິດບໍ່ແມ່ນສິ່ງທົດລອງ ທີ່ຕ້ອງລອງແລ້ວລອງອີກ ແລ້ວຄອຍສະຫລາດຂຶ້ນ. ແຕ່ຊີວິດທີ່ເບາະບາງເກີນກວ່າທີ່ຈະນຳໄປກະທົບກັບ ບັນຫາຕ່າງໆໂດຍທີ່ບໍ່ມີບັນຫາຄອຍຊີ້ນຳທາງແຕ່ຢ່າງໃດ. ແຕ່ຊີວິດເປັນສິ່ງທີ່ຕ້ອງເຝົ້າຖະຫນອມຮັກສາໃຫ້ເກີດຄຸນຄ່າໃນທຸກໂມງຍາມ ຂອງການເວລາ ໃຫ້ພົບກັບພາວະທີ່ສ່ຽງຕໍ່ບັນຫາ ທີ່ຈະເຂົ້າມາກ່ຽວພັນ ແລ້ວເຮັດໃຫ້ຊີວິດຊັກນຳໄປສູ່ຫລຸມແຫ່ງຄວາມຊົ່ວຮ້າຍ.
ເພາະຊີວິດຂອງເຮົາກໍ ບໍ່ຕ່າງຈາກການຮຽນວິຊາຫນຶ່ງ ທີ່ຕ້ອງເຮັດຄວາມເຂົ້າໃຈ ໃຫ້ຄົບຖ້ວນ. ອາດເປັນວິຊາທີ່ຍາກແລະ ມີຄວາມຊັບຊ້ອນຫລາຍກວ່າວິຊາອື່ນ. ແຕ່ຂຶ້ນຊື່ວ່າເປັນນັກສຶກສາແລ້ວ ເຮົາກໍຄວນທີ່ຈະເຮັດຄວາມຮູ້ຈັກດ້ວຍຄວາມໃສ່ໃຈກັບມັນ. ເພາະເມືຶ່ອເຮັດຄວາມຄຸ້ນເຄີຍກັບບົດຮຽນຊີວິດຢູ່ຕະຫລອດ ໂດຍມີສະຕິຄອຍຊີ້ນຳແສງສະຫວ່າງແຫ່ງຄຳຕອບ ມາມອບໃຫ້ເຮົາຍ່ອມມີໂອກາດທີ່ຈະຮູ້ຈັກຊີວິດທັງທີ່ເປັນພາຍນອກ ແລະ ຈິດໃຈພາຍໃນ ດ້ວຍຄວາມເປັນມິດຫລາຍຂຶ້ນ. ເປັນການວິໃຈທີ່ໃຫ້ເຮົາໄດ້ເບິ່ງເຫັນລາຍລະອຽດ ທີ່ເຊື່ອງຊ້ອນຢູ່ໃນນັ້ນ ແລະເພື່ອຕຽມຄວາມພ້ອມທີ່ຈະຍອມຮັບ ໃນສິ່ງທີ່ກຳລັງປ່ຽນແປງໄປຢ່າງຮູ້ເທົ່າທັນ ບໍ່ວ່າສິ່ງນັ້ນໆ ຈະມີຈຸດຈົບເປັນແນວໃດ.
ດັ່ງນັ້ນ, ການຮູ້ຈັກຮຽນຮູ້ຄຸນຄ່າຂອງການຈາກລາ ທັ້ງໃນແງ່ຂອງການເປັນເພາະຕ້ອງພັດພາກ ແລະ ຈາກຕາຍ ເພາະຄວາມສູນເສຍ ຖືວ່າເປັນສິ່ງທີ່ເຮົາຕ້ອງໃສ່ໃຈທີ່ຈະເຂົ້າໃຈຢູ່ຕະຫລອດ. ຍິ່ງເຮົາເຂົ້າໃຈ ທັງຈູດເລີ່ມຕົ້ນຂອງການເກີດຂຶ້ນ ແລະ ສິ້ນສຸດ ຂອງການຈາກລາ ຫລາຍເທົ່າໃດ, ມື້ຫນຶ່ງມື້ນັ້ນ ທຸກຢ່າງປ່ຽນແປງ ແລະ ບໍ່ໄດ້ດັ່ງຫວັງ, ຄົນເຮົາຍອມທີ່ຈະຮັບຮູ້ດ້ວຍໃຈທີ່ເປັນກາງ ແລະ ພ້ອມທີ່ຈະເຮັດຄວາມຮູ້ຈັກກັບສິ່ງໃຫ່ມໆທີ່ຈະເກີດຕາມມາແລ້ວ,ເຮົາຈະມີຄວາມສຸກໄດ້ໃນທຸກມິຕິຂອງການປ່ຽນແປງ ບໍ່ວ່າການຈາກລານັ້ນຈະວຽນຜ່ານເຂົ້າມາໃນຊີວິດຈັກຄັ້ງກໍຕາມ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
